Säämi muusikkuávdáš

Sämimuusik lii tehálâš sajattuvvâst uđđâ säämi kulttuurkuávdáš Sajosist. Säämi muusikkuávdáš koordinist já uárnee sämimuusik máttááttâs škovláid já oovded sämimuusik máttááttâsvuávámijd. Säämi muusikkuávdáš tuáimá oovtâspargoost el. Säämi máttááttâskuávdáin. Säämi muusikkuávdáá jurdân lii lasseen ovdediđ uđđâ kulttuurirâtteijeevuođâ el. falâmáin máhđulâšvuođâid sämimuusik paddiimân já vuorkkiimân, faallâđ sämiartistáid lávdástemmáhđulâšvuođâid, rähtiđ sämimuusik tobdosin já siäiluttiđ já ain ovdediđ ärbivuáválâš muusik sirdemáin tom uđđâ suhâpuolváid.

Algâaalmugij elleekovekuávdáá, Skábma ulmen lii tuárjuđ sämikielâ já kulttuur sehe adeliđ sämmilij já eres algâaalmugij jieijâs jienâ já kove oinuđ já kulluđ maailm eres kuávluin. Tooimâ ulmen lii luptiđ sämi- já algâaalmugij jieijâs elleekove- já televisiopyevtittâs taggaar táásán, ete tot puáhtá faallâđ pargo já áigápuátu-máhđulâšvuođâid kuávlu nuorâ ulmuid. Kuávdáá pargoh láá sämmilâš elleekove,  tv- já mediairâttâsâi tuárjum, sämielleekuuvij já tv-ohjelmij pyevtittem, škovliittâs vuávám, sämielleekuuvij markkânistim, kuávlu markkânistim, algâaalmugij elleekovearkkâdâhhân já tiätupaŋkkin toimâm sehe Skammâkoveh -elleekovejuuhlij ornim.

Sämmilij párnáikulttuurkuávdáá (PKK) ulmen lii lääččiđ já nanodiđ ovtâskâsulmuu já siärváduv kiärgusvuođâid jiegâlii uáiviomâduv já pyereesvaijeem, taiđâlii tooimâ já kulttuuräärbi paijeentolâmân já šoddâdmân. Párnáikulttuurkuávdáš tuáimá oovtâstpargoost eres haldâttâhkieldâiguin, kulttuurlájádâsâiguin, škovlim- já tutkâmohtâduvâiguin sehe kuálmád sektoráin. PKK huolât párnáikulttuur kyeskee tieđeetmist, oovtâstpargoost eres ornijdumijguin, kuávlulâš, väldikodálâš já aalmugijkoskâsâš oovtâstpargoost sehe párnáikulttuur projektistmist. Lasseen tooimâ ulmen lii ovdediđ sämmilii párnáikulttuur páihálávt já kuávlulávt sehe turvâstiđ sämmiláid oovtâitosijd máhđulâšvuođâid maaŋgâpiälásáid kulttuurpalvâlusáid já -ferimáid. PKK taarbâš kulttuurkuávdáá tiilijd teatterčájáttâsâi hárjuttâssaijeen já čáitálmâstooimân.